序章

序章


Written by: Joe (瘦佬)
Date: 18/3/2019

大家好,我係瘦佬或者可以叫我做呀Joe。好高興終於喺我自己嘅網站可以同大家分享一啲 窮人 head-fi 同 hifi 嘅心得,感激五年嚟各大討論區嘅網友推薦本公司,不過當中鬧我哋嘅亦都好多,希望今年會比以往做得更好,亦都可以喺呢一度介紹更多cp值高嘅head-fi同hi-fi產品,除咗主要講強國牌子,我哋亦都會討論一啲我哋冇賣嘅型號產品,期望可以畀你哋有一個資訊性 嘅購買指南喺度除咗會有我做評測同玩耳機心得之外,我亦都會同大家分享一下head-fi界嘅 行內秘密 ,除此之外 ,我哋亦都搵咗 其他 資深 耳機發燒友 同我哋喺度一齊講同分享,如果你哋都想喺度一齊講,歡迎email畀我,好講住咁多先,第一篇開始

第一篇---只要用心 人人都係head fi 大神


強國耳機呢三四年間大行其道,隨著極低廉嘅價錢,令到由小朋友學生哥,成年人,中佬,長者都可以隨時入坑,咁初玩發燒換線耳機要幾多錢呢?我喺檔口經常有人問我五百蚊一千蚊千五蚊有咩好耳機選擇,其實我都會同佢講依家一舊水都有好聲音,睇你識唔識玩最重要係識唔識配搭想玩得精明啲,就記住留意我哋啦,希望每星期都可以出到一篇或以上嘅耳機分享心得啦 好今日先講幾樣 坊間對玩耳機嘅謬論 不過小弟唔敢講我一定啱,大家就當 我飲大咗亂吹吧


1. 經常有人認為單元多為之好?
相信答案好多人都知,多單元耳機如果涵接做得唔好的話,其實仲衰過一個單元,所以選擇耳機嗰陣要留意一下啦,咁一個單元又好過多單元?其實亦都未必啱,所以沒有標準答案,最重要係睇耳機嘅質素


2. 高頻吉耳?齒音嚴重?
有很多初燒,中燒嘅師兄, 經常同我討論呢個問題, 好先講高頻吉耳,根據另一FB版主Sam哥話齋話明高頻就梗係吉耳㗎啦道理就等於我喺你面前拉小提琴拉到劏豬咁嘅聲,如果你對耳機反映返呢種刺耳嘅聲音出嚟, 你對耳機係一啲問題都冇仲非常好㖭 但有啲耳機可以做到將劏豬聲修飾為圓潤嘅高頻, 咁當然係好聽咗啦, 但其實我哋稱之為音唔準或者上唔到, 咁邊樣為之啱呢? 其實亦都冇一個標準答案, 好講到齒音嚴重 呢個問題經常性會喺動鐵耳機度發生, 其實齒音呢樣嘢係咩嚟嘅呢, 小弟愚見, 加上各大大神得到嘅資訊, 其實係動鐵震動時 所產生嘅唧唧聲, 特別會喺人聲收尾時會發出, 解決呢個問題可以透過 煲機換耳棉或者換線 去調整, 不過有一啲師兄會對呢種 唧唧 聲 特別敏感, 如果呢個情況出現喺你身上的話, 咁你唯有盡量選擇動圈耳機吧!


3. 玩耳機其實係享受,唔係考試 競爭比較
希望大家都抱著enjoy嘅心態去玩耳機經常留意到,有好多師兄玩耳機已經唔係享受音樂,例如我聽到一啲聲音你又聽唔到之後會話你咁渣㗎你對耳有問題?再唔係就你對耳機 咁平就梗係聽唔到啦小弟想喺度解說一下,我真係聽過一啲比較貴嘅耳機,所謂嘅聽多咗,並唔係樂器同解析力高咗,而係一啲唔應該有嘅雜訊又或者係其實係大家所講嘅腦放 甚至 腦放全開,不過另一啲高階嘅耳機或者前端player當然確實真係做到剛才所講嘅聽多d所以我都係奉勸大家,享受音樂最重要入坑銀包量力而為就得喇,切勿走火入魔!

今日 講住咁多先, 下次再同大家分享!!